ШИНЭ ТӨЛӨВЛӨЛТ: Таван буудал газарт хоёр автобус дамжина, тэгсэн ч хурдан очно
Мэдээ

Улаанбаатар хотын автозамын түгжрэлийг бууруулах үндэсний хорооноос нийслэлийн нийтийн тээврийн маршрутын давхцалыг арилгаж, түгжрэлийг бууруулахаар шинэ төлөвлөлт гаргажээ. Энэ төлөвлөлтийг нэгдүгээр сарын 20 буюу ирэх бямба гарагаас дагаж, мөрдүүлэх юм байна.
Иргэн Халдвартын эцсээс МУБИС буюу хэлж заншсанаар Багшийн Дээд орохын тулд Зүүнсалаа-Халдварт чиглэлийн автобусанд суугаад явж болно. Харин шинэ төлөвлөлтийг мөрдөж эхэлснээр Халдвартын эцсээс суугаад шууд Багшийн дээд, эсхүл хотын төв, ер баруун тийш явах боломжгүй болох юм байна. Өөрөөр хэлбэл та Халдвартын эцсээс Багшийн дээд хүртэл таван буудал газарт хүрэхийн тулд эхэлж суусан автобуснаасаа Зүүн дөрвөн зам дээр бууна.
Тэндээсээ дамжин суугаад зорьсон газартаа хүрнэ гэсэн үг. Дамжин суухад энгийн үед 2 минут, ачаалалтай цагт 4 минут л болно гэнэ. Эндээс гарах үр дүн нь автобуснууд богино эргэлтээр явснаар давтамж олширч, хүлээгдэл үүсэхгүй, хамгийн гол нь иргэд автомашинаасаа татгалзаж нийтийн тээврийг сонгон үйлчлүүлэх гол хөшүүрэг болно гэж үзжээ. Нийтийн тээврийн шинэ төлөвлөлт нь товчхондоо, магадгүй та одоогийнхоос олон удаа дамжин суусан ч хүрэх газраа хурдан очно аж.
Өөрөөр хэлбэл та Халдвартын эцсээс Багшийн дээд орохын тулд эхэлж суусан автобуснаасаа Зүүн дөрвөн зам дээр бууна. Тэндээсээ дамжин суугаад зорьсон газартаа хүрнэ гэсэн үг.
Үүнийг Улаанбаатар хотын автозамын түгжрэлийг бууруулах үндэсний хорооноос “Энэ сарнисан буюу өртөөчилсөн тойрог нь метротой адил зарчим юм. Та өдөрт 1000 төгрөг төлөөд Халдвартын эцсээс Зүүн дөрвөн зам хүрээд бууна. Тэндээс дахин баруун тийш явах автобусанд сууна. Автобус тасралтгүй явна, хоосон байсан ч явж л байна. Өөрөөр хэлбэл, зорчигчдыг тал талаас нь авчраад нэг цэгт буулгана. Иргэн хамгийн холдоо 500 метр газар л алхахаар байна. Энэ сарнисан тойрог гэдгийг бид ухаантайдаа зохиогоогүй. Дэлхийн улс, орнуудад хэрэгжүүлж л байгаа” гэж тайлбарлалаа.
Дээрх шинэ төлөвлөлтийн хүрээнд Улаанбаатар хотын үндсэн зургаан чиглэлд нэгдүгээр эгнээг чөлөөлөх юм байна.
Энхтайваны өргөн чөлөө,
Чингэлтэйн өргөн чөлөө,
Чингисийн өргөн чөлөөнөөс Наадамчдын зам,
Их тойруугийн гудамж,
Нарны зам,
Хүннүгийн гудамж.
Нэгдүгээр эгнээгээр зөвхөн автобус зорчино гэдэг дүрэм Энхтайваны өргөн чөлөөнд хэрэгжиж байгаа бол, нэмээд Сүхбаатарын талбайгаас Нисэх хүртэл буюу Яармаг чиглэлд нэгдүгээр эгнээгээр зөвхөн автобус зорчуулахаар төлөвлөжээ. Энэ мэтчилэн дээрх замуудыг үе шаттайгаар нийтийн тээврийн хэрэгслийн эгнээтэй болгохоор төлөвлөж байгаа аж. Улмаар дээрх зургаан чиглэлд нийт 375 автобус тасралтгүй зорчих юм байна.
Улаанбаатар хотод нийтийн тээврийн нийт 410 гаруй чиглэл байна. УИХ-ын гишүүд тойргийнхоо иргэдийн санал хүсэлтээр, зарим албан тушаалтнууд дур мэдэн, мөн нийтийн тээврийн компаниуд ашиг, орлогоо бодох зэргээр чиглэл нэмсээр энэ тоонд хүрсэн.
Улмаар буудлын давхардал, нэгдүгээр эгнээнд автобусны урт дараалал үүсгэдэг зэрэг үр дагавар гарах болсон тул чиглэлийн тоог цөөлж, автобуснуудыг богино эргэлттэй болгож байгааг Улаанбаатар хотын авто замын түгжрэлийг бууруулах үндэсний хорооноос мэдээллээ. Ингэснээр иргэд автобусанд дамжин суух тоо нэмэгдэж болох ч хүрэх газраа хурдан очих боломжтой. Улмаар нийтийн тээврийг сонгон үйлчлүүлэх хүмүүсийн тоо нэмэгдэж, нөгөө талд түгжрэл буурна гэж тооцжээ.
Нийтийн тээврийн шинэ зургаан чиглэл:
М1 чиглэл нь Таван шар-Офицеруудын ордон хүртэлх чиглэлд 75 автобус, ойролцоогоор 2-3 минутын давтамжтайгаар нийтийн тээвэрт үйлчилнэ. Эдгээр автобус өөр чиглэлд явахгүй. Эхний автобус ирэхэд араас нь дараагийн автобус 1-2 минут, цаад тал нь гурван минутын давтамжтайгаар зорчигчдоо хүлээж авна.
М2 чиглэл нь Зунжин худалдааны төвөөс урагш явсаар Сүхбаатарын талбайн зогсоол дээр очно. Улаанбаатарын төв талбайн автобусны зогсоолд баруун талаар тойрч ирээд Соёлын төв өргөөний хажуугаар явсаар зогсоол дээр хүмүүсээ буулгаж, баруун талын гарцаар гараад ордон тойроод хойш явна.
М3 чиглэл нь Нисэх-Сүхбаатарын талбайн урд талын уулзвар болох Төв шуудангийн уулзвараар нэвтрээд 20 метр яваад баруун гар тийшээ эргэнэ. Мөн адил машины зогсоол байгаа хэсэг дээр автобусны буудал төлөвлөж байна.
М4 чиглэл нь Шар хадыг хорооллын эцэстэй холбосон хойд тойруугаар явах чиглэл. Мөн ялгаагүй М2 чиглэлтэй огтлолцоно.
M5 чиглэл нь Ботаникийн цэцэрлэгт хүрээлэнгээс Дотоод хэргийн их сургуулийн урдуур явсаар Чулуун овоогоор тойрч урагш Нарны зам руу орно. Улмаар Гермес центр ороод буцаад явна.
М6 чиглэл нь шинэ зуун айл буюу Дүнжингараваас зүүн тийшээ байгуулагдаж байгаа Шинэ зуун айл Монгол тэмүүлэл, 130 дугаар сургуулийн орчимд эцсийн буудлыг нь төлөвлөсөн. Энэ нь Баянмонголын гудамжаар яваад Энхтайваны гүүрэн доогуур ороод ТЭЦ3-ийн автобусны эцсийн буудал дээр очдог.