Украины дайн эхэлснээс хойш зорчигч тээврийн 76 нисэх онгоцоо хураалгасан тухай ОХУ-ын сайд ярьжээ
Мэдээ

Украины дайнтай холбоотой Өрнөдийн хоригийн улмаас зорчигч тээврийн 76 нисэх онгоцоо хураалгасан тухай ОХУ-ын зам, тээврийн сайд Виталий Савельев өчигдөр Оросын РБК бизнес сувагт ярьжээ.
“Гэнэтийн шийдвэрээр манай онгоцнуудыг хурааж авсан. Гадаадад засварт орж байсан, агуулахад байсан, эсвэл зүгээр л нислэг гүйцэтгэж байсан 76 онгоцоо бид алдлаа. Зүгээр л хураагаад авчихсан” гэж Савельев ярьсан байна.
Одоогоор ОХУ-д нийт 1,302 нисэх онгоц идэвхтэй ашиглагдаж байгаагийн 1,167 нь зорчигч тээврийн онгоц болохыг тэр мэдээлжээ.
Зорчигч тээврийн нисэх онгоцнуудын талаас илүү хувь нь гадаад үйлдвэрийн түрээсийн онгоцнууд юм байна.
Эдгээрийн 67 хувь нь Бермудын арлууд болон Ирландад бүртгэлтэй гэнэ. Дайн эхэлсний дараахан дээрх онгоцнуудын нислэг үйлдэх зөвшөөрлийг цуцалжээ.
Хариуд нь ерөнхийлөгч Владимир Путин түрээсийн онгоцнуудыг ОХУ-д бүртгэж, зөвшөөрөл олгох шийдвэр гаргасан байна.
2022 оны гуравдугаар сарын байдлаар 800 орчим гадаадын онгоц ОХУ-д бүртгүүлжээ. Үүнийг Савельев “бид бусдын өмчийг булааж авсантай адил үйлдэл” гэж тайлбарласан байна.
Зурагт Виталий Савельев
Одоо Оросын тал гадаадын онгоц түрээслэгчидтэй хэлэлцээ хийхийг оролдож байгаа ч хориг арга хэмжээний улмаас үр дүнд хүрэхгүй байгаа гэнэ.
ОХУ-ын авиа компаниуд нисэх онгоцыг нь хураахгүй байх амлалт өгсөн 11 улсын чиглэлд нислэг үйлдэж байгаа юм байна.
Украины дайн эхэлсний дараа АНУ, Европын Холбоо болон бусад хэд хэдэн улс Оросын нисэх онгоцнуудад агаарын орон зайгаа хаасан юм.
Airbus, Boeing компаниуд ОХУ-д онгоц нийлүүлэхээ зогсоож, засвар үйлчилгээ, сэлбэгийн нийлүүлэлтээ бас зогсоосон байна.
Оросын жуулчдын хамгийн их аялдаг чиглэл болох Турк улс хүртэл энэ хоригт нэгджээ. Тухайлбал АНУ-ын Худалдааны департаментын хүсэлтийн дагуу Туркийн Худалдааны Яам саяхан Орос, Беларусийн бараг 40 нисэх онгоцонд шатахуун цэнэглэх, үйлчилгээ үзүүлэхийг хориглосон байна.
Эх сурвалж: RBC.ru