ChatGPT: Хүйтэн цаг агаар цахилгаан хөдөлгүүрт автомашины ажиллагаанд хэрхэн нөлөөлдөг вэ?
Нийтлэл

Хүйтэн цаг агаар цахилгаан хөдөлгүүрт автомашины ажиллагаанд хэрхэн нөлөөлдөг талаар бид ChatGPT хиймэл оюунт чатботоос асууж, хариулт авснаа орчуулан хүргэж байна.
Одоогийн байдлаар хүйтэн цаг агаар цахилгаан автомашины ажиллагаанд нөлөөлдөг хэд хэдэн хүчин зүйл байгааг ChatGPT тоочсон юм. Гэхдээ технологи улам сайжирч буй тул цаашдаа цаг агаарын нөлөө арилна гэдэгт итгэлтэй байгаагаа бас илэрхийлсэн байна.
1. Батарейн үр ашигтай ажиллагааг бууруулдаг . Хүйтэн цаг агаар нь цахилгаан автомашинд түгээмэл хэрэглэдэг лити-ион технологитой батарейн үр ашгийг бууруулдаг. Цахилгаан эрчим хүч үүсгэдэг химийн урвал хүйтэн үед удааширдагтай энэ нь холбоотой. Үүний улмаас автомашины үйлдвэрийн баталгаат туулах замын урт дулаан цаг агаартай үеийнхтэй харьцуулахад мэдэгдэхүйц богиносдог байна.
2. Туулах зам богиносдог. Батарейн үр ашигтай ажиллагааны бууралт нь автомашины туулах зайг шууд багасгадаг. (Жич: Зарим судалгаагаар агаарын температур Цельсийн 0-ээс -10 хэмийн хооронд буурахад цахилгаан автомашины туулах зай 30 хүртэл хувиар буурдаг нь харагдсан байна. Температур унах тусам туулах зам улам богиносож байжээ)
3. Цэнэглэхэд гардаг хүндрэл. Хүйтэн цаг агаар цахилгаан автомашиныг цэнэглэх үйл явцад бас нөлөөлдөг байна. Батарейн удирдлагын систем цэнэглэлтийг оновчтой болгохын тулд байнга ажиллаж байдагтай холбоотойгоор хүйтэн үед цэнэглэх хугацаа уртасдаг. Түүнчлэн зарим цэнэглэх станцуудын ажиллагаа хүйтэн цаг агаартай үед мууддаг нь ажиглагдсан байна.
4. Тоормослох үеийн нөлөө. Цахилгаан автомашины олон загварууд тоормослох үед үүсдэг кинетик энергийг цахилгаан эрчим хүч болгон хувиргаж, батарейн цэнэгийг нэмэгдүүлэхэд ашигладаг ба үүнийг “Regenerative Braking System” гэж нэрлэдэг. Хүйтэн цаг агаартай үед энэ системийн ажиллагаа бараг үр дүнгүй буюу хязгаарлагдмал болдог байна. Цахилгаан автомашины туулах зай богиносоход энэ бас нөлөөлдөг ажээ. Жич: уламжлалт бензин хөдөлгүүртэй автомашиныг тоормослоход үүссэн кинетик энерги халалт болж, үр ашиггүй агаарт замхардаг байна.
5. Дотоод халаалтын үзүүлэх нөлөө . Хүйтэн үед зорчигч, жолоочийн тав тухыг хангах үүднээс автомашины дотоод хэсгийг (салон) халаах шаардлагатай болно. Бензин хөдөлгүүртэй автомашинууд хөдөлгүүрийн халалтаас үүссэн дулааныг үүнд ашигладаг бол цахилгаан автомашинууд батарейн нөөцөөсөө ашигладаг. Тиймээс туулах зай богиносоход шууд нөлөөлдөг байна.
6. Дугуйн даралт. Хүйтэн үед ямар ч автомашины дугуйн даралт буурдаг. Үүний улмаас дугуйн гулсалтын эсэргүүцэл нэмэгдэж, цахилгаан автомашины туулах зай богиносоход нөлөөлдөг байна.
Тиймээс цахилгаан автомашин эзэмшигчид дугуйн хийн даралтыг хэвийн хэмжээнд байлгахад үргэлж анхаарах ёстой юм.
Эцэст нь ChatGPT хүйтэн цаг агаарын нөлөөг бууруулахын тулд цахилгаан автомашиныг цэнэглэх явцдаа халаахыг (preconditioning) зөвлөжээ.
Өөрөөр хэлбэл цэнэглэх үедээ автомашины дотоод хэсгийг халаах, батарейг халаах нь туулах зайн алдагдлыг тодорхой хэмжээгээр бууруулах урьдчилсан нөхцөл болдог байна.