Сансар судлалын шинэ өрсөлдөгч Энэтхэг
Мэдээ

Сансар судлалын салбарт өнгөрсөн оны наймдугаар сард нэгэн том онцлох үйл явдал болсон нь Энэтхэг улсын “Чандраян-3” хөлөг сарны гадаргуу дээр амжилттай газардсан явдал байлаа. Уг ажиллагаа амжилттай болсноор Энэтхэг улс саран дээр буусан АНУ, ОХУ, Хятад улсуудын эгнээнд нэгдээд зогсохгүй сарны өмнөд туйлд газардсан анхны улс болсон юм.
Саран дээр амжилттай буугаад удалгүй нарыг зорьсон ажиллагаа нь ч амжилттай болсон гээд Энэтхэг улсын сансар судлалын салбарт онцлох амжилтууд гарсаар байна. Эдгээр амжилтаа хэрхэн хямд өртгөөр бүтээж байгаа нь олон улсын анхаарлыг ихээхэн татсан.
Тухайлбал Ангараг гаргийг судлах “МОМ” ажиллагаа 74 сая ам.долларын өртөгтэй бүтсэн нь сансрын тухай алдартай кинонууд болох “Interstellar”, “Gravity”, “The Martian” зэрэг киноны өртгөөс хямд байсныг Энэтхэгийн Ерөнхий сайд онцолдог. Харьцуулахад, НАСА-гаас 2022 онд хийсэн “Артемис I” ажиллагааны ердөө хөлөг хөөргөх үйл явцад 4.1 тэрбум ам.доллар зарцуулсан байна.