Автомашин нь эвдэрсэн иргэнийг "дэлгүүрийн орлого хаалаа" гэж бухимдан зодож гэмтээжээ
Мэдээ

Хохирогч “Миний автомашин эвдрээд Баянзүрх дүүргийн ** дүгээр хороонд байрлах ... дэлгүүрийн үүдэнд зогссон. Ингээд туслах хүн дуудаж машинаа янзлуулах гээд түүнийг хүлээж байсан. Гэтэл дэлгүүрээс нэг хүн гарч ирээд “Дэлгүүрийн орлого хаагаад байна, эндээс яв" гэж хэлсэн. Би "машин эвдэрсэн хөдөлж болохгүй байна" гэхэд хаалга онгойлгож намайг машинаас буулгаж чирээд ойрхон байсан жалга руу унагаагаад миний нүүр рүү 4 удаа цохисон” гэж мэдүүлжээ. Үүнээс улбаалан маргаан үүссэн байна.
Дэлгүүрийн эзний дээрх үйлдэл нь Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан хүний эрүүл мэндэд хөнгөн гэмтэл санаатай учруулах гэмт хэргийн шинжийг бүрэн агуулж байх тул түүнийг уг гэмт хэргийг үйлдсэн гэм буруутайд тооцох хууль зүйн үндэслэлтэй байна гэж шүүх үзсэн байна.
Улмаар шүүгдэгчид Эрүүгийн хуулийн тусгай ангийн 11.6 дугаарын зүйлийн 1 дэх хэсэгт зааснаар 800 нэгжтэй тэнцэх хэмжээний буюу 800.000 төгрөгөөр торгох ял оноожээ. Мөн энэ гэмт хэрэг гарахад хүмүүс хоорондын нийгэмд тогтсон харьцааны, ёс суртахууны хэм хэмжээг үл тоомсорлосон нөхцөл байдал шалтгаалсан гэж үзсэн байна.
Эрүүгийн хуулийн 11.6 дугаар зүйл.Хүний эрүүл мэндэд хөнгөн хохирол санаатай учруулах
1.Хүний эрүүл мэндэд хөнгөн хохирол санаатай учруулсан бол дөрвөн зуун тавин нэгжээс нэг мянга гурван зуун тавин нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас гурван сар хүртэл хугацаагаар зорчих эрхийг хязгаарлах ял шийтгэнэ.
Эх сурвалж: Баянзүрх дүүргийн эрүүгийн хэргийн анхан шатны шүүх