Хүний тархинд суулгасан "Neuralink"-ийн чипийн холболт салсныг олж тогтоожээ
Нийтлэл

Энэ оны эхээр тэрбумтан Илон Маскын “Neuralink” компани хүний тархинд чип суулгах анхны мэс ажилбараа амжилттай хийсэн гэдгээ зарласан.
Тэгвэл мэс ажилбараас дөрвөн сар орчим хугацааны дараа чипийг тархитай холбосон утас нь салсан талаар лхагва гарагт мэдээлэв.
Одоогоор компанийн зүгээс яагаад салсан талаарх дэлгэрэнгүй мэдээлэл өгөөгүй ч салсан хэсгийг буцаан холбож, үйл ажиллагааг хэвэнд нь оруулсан гэсэн юм.
Чип суулгуулсан АНУ-ын иргэн Ноланд Арбауын биеийн байдалд ямар нэг сөрөг нөлөө ажиглагдаагүй бөгөөд бодлоороо шатар тоглох зэрэг үйл ажиллагаа хэвийн үргэлжилж байгаа гэлээ.
Арбауын хувьд дөрвөн мөч нь саажилттай бөгөөд чип суулгуулснаар компьютерын төхөөрөмжийг суулгасан чипийн тусламжтай удирдах боломжтой болсон юм.
Тэрбээр гуравдугаар сард чипийн суулгац "зарим талаар асуудалтай" байгаа ч түүний амьдралд томоохон өөрчлөлт авчирсан хэмээн сайшаажээ.
Хүний тархинд чип суулгахаас өмнө "Neuralink" компани 2020 онд гахайнд суулгаж, тархины үйл ажиллагааг нь судалж байсан. Мөн сармагчны тархинд чип суулгаж, видео тоглоом тоглуулах туршилт хийж байв.
Эх сурвалж: The Guardian