Сицилийн ойролцоо дарвуулт хөлөг живсний улмаас Британийн бизнесмэн болон өөр таван хүн сураггүй алга болжээ
Даваа гарагийн өглөө эрт Сицили арлын ойролцоо Газрын дундад тэнгист хөвж явсан хувийн дарвуулт хөлөг живсний улмаас зургаан хүн сураггүй алга болжээ Тэдний дунд Британийн технологийн салбарын бизнесмэн Майк Линч болон түүний 18 настай охин байгаа юм Bayesian нэртэй 56 метр урт хөлөг дээр Британи АНУ Канадын 22 иргэн зорчиж

Даваа гарагийн өглөө эрт Сицили арлын ойролцоо Газрын дундад тэнгист хөвж явсан хувийн дарвуулт хөлөг живсний улмаас зургаан хүн сураггүй алга болжээ.
Тэдний дунд Британийн технологийн салбарын бизнесмэн Майк Линч болон түүний 18 настай охин байгаа юм.
“Bayesian” нэртэй 56 метр урт хөлөг дээр Британи, АНУ, Канадын 22 иргэн зорчиж явснаас 15 хүнийг аварсан тухай Италийн аврах албаныхан мэдээлжээ.
Шөнө тэнгист дэгдсэн хүчтэй шуурганы улмаас хөлөг онгоц хөмөрч, живсэн байна.
Майк Линч
Зарим хүмүүс “Британийн Билл Гэйтс” гэж хочилдог Линч нь программ хангамжийн Autonomy компанийг үүсгэн байгуулалцсан бөгөөд сүүлд уг компанийг нь технологийн аварга компани Hewlett-Packard $11 тэрбумаар худалдан авч байсан юм.
Италийн шумбагчид живсэн хөлөг онгоц Сицилийн нийслэл Палермо хотоос холгүй тэнгисийн усны 50 метрийн гүн ёроолд байгааг тогтоожээ.
Сураггүй алга болсон хүмүүсийн эрлийн ажил үргэлжилж байна.
Живсэн хөлгийн дэргэдээс нэг хүний цогцос олдсон бөгөөд аль улсын иргэн болохыг хараахан тогтоогоогүй байгааг Сицили арлын иргэний хамгаалалтын газрын захирал Салваторе Кочина мэдээлжээ.
“Bayesian” хөлөг Линчийн эхнэр Ангела Бакаресын өмчлөлд байдгийг хэвлэлүүд олж мэдээлсэн байна. Бакарес өөрөө амьд гарсан юм.
Аврагдсан хүмүүсийн дунд нэг настай охиноо гартаа тэвэрсэн 35 настай эмэгтэй байсныг эх сурвалжууд мэдээлжээ.
Уг аяллыг Линч өөрийн бизнесийн хамтрагчдын дунд зохион байгуулсныг аврагдсан хүмүүс баталсан байна.
Өнгөрсөн долоо хоногийн дундаас хойш Газар дундын тэнгисийн баруун хагас хүчтэй шуургатай байжээ. Ням гарагаас Даваа гарагт шилжих шөнө Сицили арлын хойд эргийн дагуу шуурга дайран өнгөрснийг цаг уурын мэргэжилтнүүд баталсан байна.
Хөлгийн нэр нь Линчийн хөрөнгийн гол эх үүсвэр болсон компьютерын программын нэр ажээ.
Эх сурвалж: BBC