Hertz компани засвар үйлчилгээ нь хэтэрхий өндөр өртөгтэй шалтгаанаар 20,000 цахилгаан машинаа зарна
Мэдээ

АНУ-ын автомашин түрээсийн Hertz компани засвар үйлчилгээний зардал нь хэтэрхий өндөр гэсэн шалтгаанаар цахилгаан хөдөлгүүртэй 20,000 машинаа зарахаар болсныг өчигдөр зарлажээ.
Энэ нь тус компанийн нийт цахилгаан хөдөлгүүрт автомашинуудын гуравны нэг орчим бөгөөд Tesla, Chevrolet Bolt, Volvo зэрэг брэндүүдээс бүрдэж байгаа юм байна.
“Осол, эвдрэл гэмтлээс бусад өдөр тутмын үйл ажиллагааны зардал цахилгаан автомашинуудын хувьд буурахгүй, өндөр хэвээр байгаа нь ийм шийдвэр гаргахад хүргэлээ” гэж Hertz компанийн мэдэгдэлд өгүүлжээ.
Уг цомхотгол 2024 оны санхүүгийн үр дүнд нь сайнаар нөлөөлөхийг бас мэдээлсэн байна. Гэвч мэдэгдлийн дараа тус компанийн хувьцааны ханш 6 хувиар унажээ.
Түрээсийн үйлчилгээний аварга компани Hertz 2021 онд цахилгаан автомашинд шилжих томоохон төлөвлөгөө зарлаж байв.
Үүнийг нийтээрээ дотоод шаталтын хөдөлгүүрээс цахилгаан хөдөлгүүрт шилжих үйл явцыг түргэсгэх чухал алхам гэж зах зээлийн шинжээчид үнэлж байлаа.
Гэвч өнгөрсөн хугацаанд нийт авто салбарын шилжилтийн үйл явц төсөөлснөөс удаан байсан юм. Тухайлбал үйлдвэрлэгчид төсөөлж байснаас цөөн загварын цахилгаан автомашин зах зээлд гаргасан нь хүмүүст өндөр үнэтэй цөөхөн сонголтыг тулгаж байгаа.
Hertz компани зарсан цахилгаан машинуудынхаа оронд дотоод шаталтын хөдөлгүүртэй автомашинуудаар баазаа шинэчлэх ажээ.
Эх сурвалж: Business Insider