Орчин үеийн Су-57 байлдааны нисэх онгоцыг анх удаа Оросын нутаг дэвсгэрт устгаснаа Украины тал мэдээллээ

ОХУ-ын өмнөд хязгаарын агаарын баазад байрлаж байсан хамгийн сүүлийн үеийн Су-57 байлдааны нисэх онгоцыг устгаснаа Украины цэргийн тагнуулын алба Ням гарагт мэдээлжээ.
Су-57 нь 2020 оны арванхоёрдугаар сард Оросын агаарын хүчний зэвсэглэлд анх нэвтэрсэн онгоц бөгөөд Зөвлөлтийн үеийн Су-27, МиГ-29 загварын онгоцнуудыг халах зорилготой юм.
“Зургаадугаар сарын 8-ны өдөр Оросын Астрахань мужийн Ахтубинск агаарын баазад байрлаж байсан Су-57 олон зориулалтын байлдааны нисэх онгоцыг хилийн шугамаас 589 км зайд устгалаа. Энэ бол түүхэнд Су-57 онгоцыг устгасан анхны тохиолдол юм” гэж Украины цэргийн тагнуулын алба мэдээлжээ.
Уг мэдэгдэлдээ цохилтын өмнөх ба дараах агаарын баазын байдлыг харуулсан хиймэл дагуулын зургийг хавсаргасан байна.
Цохилтыг гүйцэтгэхдээ Украинд үйлдвэрлэсэн нисгэгчгүй онгоцыг ашиглажээ.
Украины тал өөрийн нисгэгчгүй онгоцоор Оросын нутаг дэвсгэрийн гүнд байрладаг цэргийн болон эрчим хүчний байгууламжуудыг байнга довтолж байгаа.
ОХУ-ын батлан хамгаалах яам Бямба гарагт Астрахань мужийн нутаг дэвсгэрт гурван нисгэгчгүй онгоц устгаснаа мэдээлсэн байна.
Эх сурвалж: AFP