Xiami компанийн дараагийн машины тухай сураг гарч эхэллээ - MX11 кроссовер

Өргөн хэрэглээний цахилгаан барааны нэрд гарсан үйлдвэрлэгчийн цахилгаан машины нэгж болох Хятадын Xiaomi Auto компани нь хоёр дахь машины болох Xiaomi MX11 кроссоверын прототипийг зам дээр туршиж эхэлжээ. Бүрэн хуулгаар бүрж нуусан жинхэнэ машин гэсэн үг.
Xiaomi-ийн анхны цахилгаан машин SU7 седан нь Хятадад жинхэнэ сенсаац болж захиалга борлуулалт тун өндөр байгаа тул энэхүү кроссоверын хүлээлт ялгаагүй өндөр байгаа юм. Хятадууд өөрсдийнхөө бүтээсэн машинуудад улам бүр дурлах болжээ.
3D рендерийн ур чадвартай залуучууд энэхүү хуулга бүхий тэргийн ерөнхий загвар дээр үндэслэн нарийн дизайныг рендерлэж гаргасныг нь бид харж байна. Бараг л ялгаагүй болсон мэт.
Xiaomi SU7-ийн шүтэн бишрэгчид Porsche Taycan-тай төстэй байдагт нь татагддаг билээ. Тэгвэл MX11-ийг Porsche Macan-тай яг ижилхэн, дэгжин, спортлог дүрсэлсэн нь Xiaomi Auto-ийн дизайнеруудад ч таалагдаж буй бололтой.
MX11 индекс нь бүтээгдэхүүний техникийн нэр бөгөөд зах зээлийн нэр нь өөр байх болно. Кроссовер нь SU7 седантай адилхан платформтай. 800 вольтын цахилгаан архитектур, 100 кВт.ц-аас дээш хүчин чадалтай батерей, нэгдүгээр зэрэглэлийн харилцаа холбоо, мультимедиа тоноглолтой. Энэ тал дээр Xiaomi аль хэдийн тэргүүлэгч байр суурь руу дайрч буй.
Компанийн цахилгаан автомашины амбиц ч мөн адил өндөр. Ирэх 15-20 жилийн хугацаанд Xiaomi Auto компанийн гүйцэтгэх захирал Лэй Жионгийн хэлснээр дэлхийн автомашины үйлдвэрлэлийн шилдэг таван удирдагчийн нэг болох ёстой.