Замтай болохын тулд авто зам ашигласан төлбөрийг нэмэгдүүлдэг нь олон улсын жишиг
Улаанбаатар хотын иргэдэд хамгийн их тулгамдаж байгаа асуудлын нэг бол яах аргагүй авто замын түгжрэл Түгжрэлийг бууруулахаар олон ч Засгийн газраас арга хэмжээг авч хэрэгжүүлж байсан Эцэс сүүлдээ түгжрэлийг бууруулах ганц арга бол авто замуудаа сайжруулах давхар замууд хурдны зам барьж тэдгээр замаар нэвтрэх тээврийн хэрэгслүүдийг төрөлжүүлэх гэдгийг өнөөдөр нэг

Улаанбаатар хотын иргэдэд хамгийн их тулгамдаж байгаа асуудлын нэг бол яах аргагүй авто замын түгжрэл. Түгжрэлийг бууруулахаар олон ч Засгийн газраас арга хэмжээг авч хэрэгжүүлж байсан. Эцэс сүүлдээ түгжрэлийг бууруулах ганц арга бол авто замуудаа сайжруулах, давхар замууд, хурдны зам барьж, тэдгээр замаар нэвтрэх тээврийн хэрэгслүүдийг төрөлжүүлэх гэдгийг өнөөдөр нэг юм олж ухаарлаа. Тухайлбал, өнгөрсөн 2024 онд нийслэлийн хэмжээнд 137.1 км авто замыг бүрэн шинэчилсэн нь сүүлийн 10 жилийн дундажтай харьцуулахад 10 дахин урт аж. Тухайлбал, 2021 онд 12.9 км, 2022 онд 15 км, 2023 онд 18.5 км урт замыг шинэчилж байсантай харьцуулахад 2024 онд шинэчилсэн авто зам мэдэгдэхүйц үр дүнг харуулж байна.
Тэгвэл 2025 оны нэгдүгээр сарын 1-нээс авто тээврийн болон өөрөө явагч хэрэгслийн албан татварыг 2-3 дахин, авто зам ашигласны төлбөрийг 5 дахин нэмсэн НИТХ-ын тогтоолоор хэрэгжиж эхлээд байна. Энэ нь иргэдийн хувьд татвар, хураамжийг нэмэгдүүлж, ачаа үүрүүлж байгаа мэт боловч угтаа авто замыг шинэчлэн сайжруулах, ингэснээр замын түгжрэлийг бууруулахад маш том хөрөнгө оруулалт болох юм. Иргэдийн зүгээс эх орны хувь хишигт мөнгө тараахын оронд нийгэмд хэрэгтэй бүтээн байгуулалт, нэг ч гэсэн хэрэгтэй юм хийгээсэй гэсэн хүлээлт их байдаг шүү дээ. Яг үүнтэй л адил өнөөдөр та приүс-20 автомашинтай бол авто зам ашигласны төлбөрт жилд 100 мянган төгрөг төлнө. Өөрөөр хэлбэл, нэг сард 8333 төгрөг, харин өдөрт 278 төгрөгийг авто замыг ашиглалаа хэмээн төлөх юм. Харин хөдөлгүүрийн багтаамж 5000-аас дээш буюу жишээлэхэд Lexus 570 маркийн автомашин бол жилд 250,000 төгрөгийг авто зам ашигласны төлбөрт төлнө. Энэ нь сард 20,833 төгрөг, өдөрт 694 төгрөгийг авто зам ашиглалаа хэмээн төлж байна. Эдгээр татвар, хураамжаас олсон орлогыг нийслэлийн замын санд төвлөрүүлж, замын сангийн орлогын эх үүсвэрийг 151.5 тэрбум төгрөгөөр нэмэгдүүлэхээр ирэх оны төсөвт тусгаад байна. Мэдээж энэ бүх хөрөнгө оруулалтыг нийслэлийн авто замын сүлжээг сайжруулах, өргөтгөх, түгжрэлийг бууруулах, замын арчлалт, урсгал засвар, техник технологийг шинэчлэхэд зарцуулахаар төсөл, хөтөлбөрүүд батлагдаж байна.
Эх сурвалж: News.mn