А.Баяр: Трамвай 300-500 хүн тээвэрлэх хүчин чадалтай тул түгжрэлийг бууруулах бололцоотой
Нийслэлийн ИТХ ын ээлжит II хуралдаанаар Улаанбаатар хотын 2040 он хүртэлх хөгжлийн ерөнхий төлөвлөгөөний төслийн танилцуулга зэрэг 16 асуудлыг өнөөдөр 2025 01 27 хэлэлцэж байна Энэ үеэр дээрх төслүүд Улаанбаатар хотын хөгжилд хэрхэн нөлөөлөх талаар НИТХ ын дарга А Баяр мэдээлэл өглөө Тэрбээр Улаанбаатар хотыг 2040 он хүртэл хөгжүүлэх ерөнхий

Нийслэлийн ИТХ-ын ээлжит II хуралдаанаар Улаанбаатар хотын 2040 он хүртэлх хөгжлийн ерөнхий төлөвлөгөөний төслийн танилцуулга зэрэг 16 асуудлыг өнөөдөр /2025.01.27/ хэлэлцэж байна.
Энэ үеэр дээрх төслүүд Улаанбаатар хотын хөгжилд хэрхэн нөлөөлөх талаар НИТХ-ын дарга А.Баяр мэдээлэл өглөө.
Тэрбээр, "Улаанбаатар хотыг 2040 он хүртэл хөгжүүлэх ерөнхий төлөвлөгөөний талаар бид олон асуудлыг хэлэлцэж байгаа. Энэ төлөвлөгөөг одоогоор УИХ-аар хэлэлцэж байна. Тэгэхээр "баталлаа" гэж хэлэх боломжгүй. Гэхдээ өнөөдөр Нийслэлийн иргэдийн хурал дээр Улаанбаатар хотыг 2040 он хүртэл хөгжүүлэх концепцын агуулгыг иргэдэд танилцуулж, бүх зүйлсийг нээлттэй хэлэлцэж байгаа. Үндсэн зорилго нь иргэдэд мэдээлэл өгөх, тэдний оролцоог хангах.
Бидний хийх гол ажил бол эдгээр том мега төслүүдийг амжилттай хэрэгжүүлэх. Үүний тулд иргэдийн хуралд сууж байгаа төлөөлөгчид тойрогтоо очиж, энэ 2040 он хүртэлх хөгжлийн төлөвлөгөөг иргэдэд нэг бүрчлэн танилцуулж, санал авна. Ингээд энэ мэдээллүүдийг эргээд УИХ-д өргөн барьж, тэдний дээр дэмжлэг авна.
Сэлбэ дэд төвийн хүрээнд 12 мянган айлын орон сууц барих төсөв бүрэн батлагдсан.
Эцсийн зорилго бол Улаанбаатар хотын хөгжлийг 2040 он гэхэд бодитойгоор шийдэх, иргэдийн амьдралын чанарыг сайжруулах. Үүний тулд бид ажиллаж байгаа. Одоогийн байдлаар бид иргэдэд мэдээлэл өгөх үүднээс лобби бүлэг үүсгэж, хамтран ажиллаж байна.
Төсөл дээр бол одоо агаарын бохирдол, авто замын түгжрэл, дэд бүтцийн асуудал шийдвэрлэхэд ихээхэн анхаарч байна. Тухайлбал, орон сууцжуулалт нь агаарын бохирдлыг бууруулах чухал хэсэг. Сэлбэ дэд төвийн хүрээнд 12 мянган айлын орон сууц барих төсөв бүрэн батлагдсан. Үүнийгээ дөрвөн жилийн хугацаанд хэрэгжүүлнэ.
Гэхдээ орон сууцны төслүүд хэрэгжүүлэхэд цахилгаан, дулааны дутагдалтай холбоотой асуудлууд үүсэж байна. Тиймээс цахилгаан станцуудыг барих, Бөөрөлжүүтийн цахилгаан станцыг ашиглалтад оруулах зэрэг олон арга хэмжээг авч байна. Мөн ТЭЦ-5-ын барилгын ажил 2025 оноос эхлэхээр төлөвлөгдсөн.
Авто замын түгжрэлтэй тэмцэх хүрээнд богино, дунд, урт хугацааны олон төслүүдийг хэрэгжүүлж байгаа. Метро төсөлд 1, 2-р шугамын ажил үргэлжилж байгаа бөгөөд есдүгээр сарын дотор бүтээн байгуулалтын ажлыг эхлүүлэх боломжтой.
Туулын хурдны замын төслийн ажил ч явж байна. Энэ 33 км авто замын ажил одоо парламентын түвшинд хэлэлцэгдэж байгаа бөгөөд энэ төсөл нь ч удахгүй хэрэгжих боломжтой.
Үүгээр дамжуулаад бид Улаанбаатар хотыг 2040 он гэхэд шинэ түвшинд хүргэхэд бүх талын хүчин чармайлт гаргаж ажиллаж байна.
Засгийн газрын бүрэлдэхүүн бүхэлдээ хотын асуудал руу анхаарч байсан түүх байгаагүй.
Хэвлэлийн бага хурал зарлаж, одоо мэдээлэл өгнө өө гэсэн ойлголттой байна. За, нэмэлтээр хэлэхэд, мэдээж авто замын түгжрэлийг бууруулахын тулд хамгийн чухал зүйлсийн нэг бол автобусны тусгай эгнээ болон трамвайн асуудал. Яагаад гэвэл трамвай 300-500 хүн тээвэрлэх хүчин чадалтай. Тиймээс трамвайн замыг бий болгох замаар авто замын түгжрэлийг бууруулах бололцоотой гэж харж байна. Трамвай, автобусны тусгай эгнээний асуудлыг олон улсын байгууллагатай хамтарч зохион байгуулж байна. Энэ ажлыг 2026-2028 онд бүрэн дуусгана гэж харж байгаа.
Мөн дүүжин тээвэр болон бусад томоохон төслүүд байна. Трамвай болон автобусны эгнээний асуудал тусдаа эсэх талаар судалгаагаар тус тусдаа замаар явуулах тохиргоо байгаа ч эцсийн шийдвэр гараагүй байна.
-2024-2028 онуудад авто замын түгжрэл буурна гэж та хэлсэн. Тэгэхээр 2028 он гэхэд эдгээр томоохон төслүүд бодитой хэрэгжиж, иргэд метро, дүүжин тээврээр зорчдог болно гэж бодож байна уу?
-Мэдээж, бид хөгжлийн гараан дээр байна. Шулуухан хэлэхэд, ерөнхий сайд, хотын захирагч аль аль нь ийм тос мега төслүүд рүү эв нэгдэлтэйгээр, нэг зорилготойгоор нэг зам дээр зогсож байсныг би мэдэхгүй. Улаанбаатар хотыг хөгжлийнхөө цорын ганц түлхүүр, гараан дээрээ байна гэж харж байна.
Улаанбаатар хотын хөгжлийг зөвхөн дөрвөн жилийн хугацаанд шийднэ гэдэг нь үнэхээр амаргүй ажил. Энэ бүхний тулд Засгийн газрын бүрэлдэхүүн бүхэлдээ хотын асуудал руу анхаарч байсан түүх байгаагүй.
Яг энэ хүрээнд долоо хоног бүр Засгийн газрын хуралдаанаар шуурхай штаб хуралдаж, метро болон дүүжин тээврийн асуудлуудыг шийдвэрлэх арга хэмжээг авч байна. Холбогдох сайд дарга нарт үүрэг өгөөд, гацсан ажлуудыг хурдан шийдвэрлэхээр ажиллаж байгаа. Монгол Улс даяар хөдөлж байгаа.
Бид иргэдэд шаардлагатай мэдээллийг өгч, иргэдийн асуудлыг шийдэх боломжийг нээх ёстой. Мега төслүүдийг амжилттай хэрэгжүүлэхэд иргэдийн дэмжлэг чухал. Энэ бол бага хэмжээний мөнгө биш, өндөр хэмжээний зардал шаарддаг томоохон төслүүд. Мега төслүүдийн үр дүнг иргэд ойлгох ёстой.
Иргэдийн хурал манлайлж, мэдээллийг түгээх үүрэгтэй. Эдгээр төслүүдийн талаар МҮОНРТ-тэй хамтарч хэлэлцүүлэг зохион байгуулж, мэдээллийг иргэдэд нээлттэй өгөх нь чухал. 2040 он хүртэлх хөгжлийн ерөнхий төлөвлөгөөнд орсон 7 асуудал, 23 мега төсөлтэй холбоотой мэдээллүүдийг олон нийтэд хүргэнэ.
Төсвийн талаар хэлэхэд, ТЭЗҮ-үүд нь заримдаа өндөр зардалтай байж болох ч бид дэлхийн түвшний ТЭЗҮ боловсруулах чадвартай багуудтай хамтран ажиллаж байна. Нээлттэй сонгон шалгаруулалт зарлаж, зөвхөн хамгийн чадвартай байгууллагуудтай хамтарч байна" гэлээ.