Цахилгаан автомашины төсөл бүтэлгүйтсэн нь Honda-гийн удирдлагад хямрал үүсгэв
Honda гийн цахилгаан автомашины том мөрөөдөл хүндхэн саадтай тулгарлаа Honda Zero нэртэй АНУ ын зах зээлд чиглэсэн цахилгаан автомашины төслийг албан ёсоор зогсоосноос хэдхэн долоо хоногийн дараа компанийн удирдлагын хүрээнд томоохон маргаан дэгдсэн талаар Reuters агентлаг мэдээллээ Honda Motor компанийг 1990 1998 онд удирдаж байсан өдгөө 90 настай Нобухико Кавамото

Honda-гийн цахилгаан автомашины том мөрөөдөл хүндхэн саадтай тулгарлаа.
Honda Zero нэртэй, АНУ-ын зах зээлд чиглэсэн цахилгаан автомашины төслийг албан ёсоор зогсоосноос хэдхэн долоо хоногийн дараа компанийн удирдлагын хүрээнд томоохон маргаан дэгдсэн талаар Reuters агентлаг мэдээллээ.
Honda Motor компанийг 1990-1998 онд удирдаж байсан, өдгөө 90 настай Нобухико Кавамото одоогийн гүйцэтгэх захирал Тошихиро Мибэтэй биечлэн уулзаж, албан тушаалаасаа огцрохыг шаарджээ.
Honda-ийн хуучин удирдлагуудын зөвлөлийг төлөөлсөн Кавамотогийн үзэж байгаагаар Honda Zero төслийн бүтэлгүйтэл нь зөвхөн нэг асуудал биш аж. Тэд Мибэг үйлдвэрлэлийн бодлогоо хангалттай анхаараагүй, мөн дэлхийн хамгийн том автомашины зах зээлүүдийн нэг болох Хятадад хангалттай идэвхтэй ажиллаагүй гэж буруутгажээ.
Гэсэн ч Тошихиро Мибэ сайн дураараа огцрохоос татгалзаж, асуудлыг компанийн хараат бус захирлуудаас бүрдсэн нэр дэвшүүлэх хороонд шилжүүлсэн байна. Энэхүү хороо нь тэтгэвэрт гарсан удирдлагуудын нөлөөг бууруулах зорилгоор байгуулагдсан бөгөөд эцэст нь Мибэг албан тушаалд нь хэвээр үлдээх шийдвэр гаргажээ.
Honda компани өнгөрсөн тавдугаар сард автомашины хөгжлийн шинэ стратегиа танилцуулсан. Үүний дагуу цэвэр цахилгаан автомашинд бүх хүчээ төвлөрүүлэхийн оронд гибрид хөдөлгүүртэй загваруудад илүү их анхаарал хандуулахаар болсон байна.
Өмнө нь Honda Zero төслийн бүтэлгүйтлээс үүдэн Honda ойролцоогоор 15.7 тэрбум ам.долларын алдагдал хүлээсэн талаар мэдээлж байсан юм.
Автомашины салбарын хувьд энэ нь нэг зүйлийг дахин баталлаа. Цахилгаан автомашины эрин үе ирж байгаа ч зөвхөн том хөрөнгө оруулалт хангалтгүй. Зах зээлийн бодит эрэлт, үйлдвэрлэлийн чадамж, бүс нутгийн өрсөлдөөнийг зөв тооцоолохгүй бол дэлхийн хамгийн нэр хүндтэй үйлдвэрлэгч хүртэл олон тэрбум долларын алдаа гаргаж чаддаг байна.