Нэгхэн HTTP хүсэлтээр вэбсайтуудыг хакерджээ: WordPress-ийн ноцтой эмзэг байдлыг ChatGPT ашиглан боловсруулсан байна
Халдагчид вэбсайт руу кибер халдлага хийхдээ зорилгоо нуухыг ч оролдохгүй байна Гол мэдээллүүд Аюулгүй байдлын судлаачид ldquo wp 2 shell rdquo нэртэй ноцтой эмзэг байдлыг Chat GPT д ашиглагддаг GPT 5 6 Sol загвар ердөө 10 цагийн дотор 25 ам долларын токены зардлаар боловсруулсныг баталжээ Бодит орчинд ажиглагдсан халдлага хоёр

Халдагчид вэбсайт руу кибер халдлага хийхдээ зорилгоо нуухыг ч оролдохгүй байна.
Гол мэдээллүүд
Аюулгүй байдлын судлаачид “wp2shell” нэртэй ноцтой эмзэг байдлыг ChatGPT-д ашиглагддаг GPT-5.6 Sol загвар ердөө 10 цагийн дотор, 25 ам.долларын токены зардлаар боловсруулсныг баталжээ.
Бодит орчинд ажиглагдсан халдлага хоёр HTTP POST хүсэлт ашигладаг. Эхний хүсэлтээр сайт эмзэг эсэхийг шалгаж, хоёр дахь хүсэлтээр SQL injection (SQL код шахах халдлага) ажиллуулан серверт web shell (алсаас команд ажиллуулах арын хаалга) байршуулдаг.
Халдагчид WordPress-ийн /?rest_route=/batch/v1 хаягаар эмзэг сайтуудыг олноор нь шалгаж байгаа тул сайт эзэмшигчдийг системээ нэн даруй шинэчлэхийг анхааруулжээ.
Эмзэг WordPress сайт руу ганцхан HTTP хүсэлт илгээхэд л бүх зүйл дуусна. Судлаачид өмнө нь олж авсан хүсэлтийн өгөгдлийг ашиглан хакерууд администраторын эрхийг хэрхэн хялбархан авч болохыг үзүүлжээ.
Сүүлийн арван жилийн WordPress-ийн хамгийн ноцтой эмзэг байдлуудын нэг болох “wp2shell” -ийг ChatGPT-д ашиглагддаг OpenAI-ийн хүчирхэг загвар GPT-5.6 Sol ердөө 25 ам.долларын токены зардлаар гаргажээ.
SANS Technology Institute-ийн судалгааны албаны декан Йоханнес Б. Уллрих халдагчид сайтууд руу илгээж буй бодит хүсэлтийн жишээг нийтэлсэн байна. Уг хүсэлт нь сайт саяхан ил болсон “wp2shell” эмзэг байдалд өртөмтгий эсэхийг шалгадаг.
Судлаачийн хэлснээр тэдний honeypot (халдагчдыг ажиглах зориулалттай өгөөш систем) руу ийм халдлагын оролдлогууд ирж эхэлжээ. Харин бүрэн хэмжээний хүсэлтийн өгөгдлийг SANS Internet Storm Center-ийн нэг уншигч илгээсэн байна.
Халдлагад маш олон давхар бүтэцтэй ганц HTTP/1.1 POST хүсэлт хангалттай. Гэхдээ бодит халдагчид нийт хоёр хүсэлт илгээдэг бөгөөд эхнийх нь сайт эмзэг эсэхийг тогтооход зориулагджээ.
Халдагч өөрийн зорилгыг нуухыг ч оролдоогүй бөгөөд cve-2026-63030/1.0 нэртэйгээр өөрийгөө танилцуулсан байна. Өөрөөр хэлбэл хэрэглэгчийн агентын нэрийг уг эмзэг байдлын дугаараар шууд нэрлэжээ.
Хүсэлтүүд нь WordPress REST API-ийн зөвшөөрөлгүйгээр нийтэд нээлттэй дуудагдах боломжтой /?rest_route=/batch/v1 гэсэн багц хүсэлтийн хаягийг онилдог.
Тэд текст шүүлтүүрээс зайлсхийхийн тулд хэд хэдэн давхар кодчилол ашиглана. Тухайлбал текстийг арван зургаатын тооллын хэлбэрээр кодолж, \x тэмдэглэгээгээр командыг үсэг үсгээр нь үүсгэдэг.
Энэ олон давхар бүтэц нь route-confusion bug (хүсэлтийн чиглэлийг буруу таних алдаа) -ийг өдөөдөг. Өөрөөр хэлбэл хүсэлт дотор дахин хүсэлт оруулснаар WordPress тэдгээрийг буруу эрхээр боловсруулахад хүргэдэг.
Хортой SQL хүсэлтийг хамгийн сүүлийн хүсэлтийн author_exclude талбарт нуусан байна. WordPress энэ параметрт зохиогчийн ID бүхий тоон утга ирнэ гэж тооцдог ч текстэн утгыг хангалттай цэвэрлэж шалгадаггүй аж.
Судлаач нийтлэлдээ:
“Энэ халдлага ердийн SQL injection загварыг дагаж байна. Хоёр дахь SELECT хүсэлтийг ажиллуулахын тулд UNION ашигладаг”
гэж тайлбарлажээ.
SQL UNION нь хоёр тусдаа өгөгдлийн сангийн хайлтын үр дүнг нэгтгэх хууль ёсны боломж боловч халдагчид анхны хүсэлтэд өөрсдийн бэлтгэсэн хоёр дахь хүсэлтийг хавсаргахад ашигладаг. Эхний шалгах үе шатанд нэмэлт SELECT хүсэлт нь систем SQL injection халдлагад өртөмтгий эсэхийг тогтооно. Хэрэв эмзэг байвал вэбсайтын хариунд ||OK|| гэсэн тэмдэглэгээ гарч ирдэг. Үүний дараа халдагч ижил төстэй бүтэцтэй, жинхэнэ хортой хүсэлтийг хоёр дахь HTTP POST хүсэлтээр илгээнэ.
Хоёр дахь хүсэлтийн SQL injection нь SELECT командыг ашиглан сервер дээр PHP код бүхий файл бичиж, энгийн web shell үүсгэдэг. Энэ нь сервер дээр алсаас команд ажиллуулах арын хаалга болдог. Халдагчид /wp-content/cache/ хавтсанд 94uh9ubh6e1x.php нэртэй файл байршуулдаг. Энэ web shell-д дурын хүн хандахад ердийн 404 алдаа харагдах боловч зөв нууц параметр ашиглавал ажилладаг. Өөрөөр хэлбэл уг параметр нууц үгийн үүрэг гүйцэтгэнэ.
Уллрих:
“Би үүнийг ‘Jedi алдаа’ гэж нэрлэдэг. ‘Таны хайж буй хуудас энэ биш’ гэсэн санаа”
гэжээ.
Халдагч дараа нь WordPress-ийн өгөгдлийн санд шинэ администратор хэрэглэгч нэмсэн байна.
Судлаач цэвэрлэгээ хийх зөвлөгөө болгон:
“/cache/ хавтсанд шинээр үүссэн файл байгаа эсэх болон саяхан нэмэгдсэн хэрэглэгчдийг шалга”
гэж анхааруулжээ.
Сайт эзэмшигчид өөрсдийн вэбсайт уг эмзэг байдалд өртсөн эсэхийг шалгаж, WordPress-ээ нэн даруй шинэчлэх шаардлагатай.
Энэ эмзэг байдлыг ChatGPT илрүүлжээ
“wp2shell” эмзэг байдлыг илрүүлсэн Searchlight Cyber компанийн аюулгүй байдлын судлаач Адам Кьюсийн хэлснээр үүнийг олоход OpenAI-ийн тухайн үеийн хамгийн хүчирхэг том хэлний загвар болох GPT-5.6 Sol Ultra л хангалттай байжээ. Энэ загвар ChatGPT-д мөн ашиглагддаг.
Судлаач сарын 200 ам.долларын захиалга ашиглаж, долоо хоногийн токены лимитийнхээ 50 хувийг зарцуулсан тул төслийн нийт өртгийг 25 ам.доллар гэж тооцсон байна. Харин уг эмзэг байдлыг зуучлагчдад худалдсан бол 500 мянган ам.доллар хүрэх боломжтой байжээ.
Кьюс хиймэл оюун ухаан ийм үр дүнд хүрнэ гэдэгт эхэндээ итгээгүй аж. Тэр загварын хамгаалалтыг тойрч гарах тусгай арга хэрэглээгүй бөгөөд зөвхөн урьдчилан нэвтрэлт шаардалгүйгээр RCE (сервер дээр алсаас код ажиллуулах эмзэг байдал) олох даалгавар өгч, zero-day илрүүлэх чадварыг нь шалгасан байна.
Дэлгэрэнгүй тайланд:
“WordPress бол бүх цаг үеийн хамгийн сайн хамгаалагдсан системүүдийн нэг. Мөн энэ арван жилд урьдчилан нэвтрэлт шаарддаггүй, бодитой ноцтой эмзэг байдал бараг гараагүй”
гэжээ.
Мөн:
“Энэ бүрэн хэмжээний exploit chain (олон эмзэг байдлыг дараалуулан ашигласан халдлагын гинжин хэлхээ)-ийг ердөө 10 гаруй цагийн дотор гаргасан”
хэмээн онцолсон байна.
Кьюсийн үзэж буйгаар энэ нь хиймэл оюун ухааны чадвар шинэ түвшинд хүрснийг харуулж байна. Учир нь GPT-5.6 Sol хэд хэдэн тусдаа, бүтээлч алдааг хооронд нь уялдуулан нэг халдлагын гинжин хэлхээ болгож чаджээ.
Тэрээр:
“Би үүнээс ерөнхий дүгнэлт хийхгүй. Гэхдээ ямар ч аюулгүй байдлын судлаач хиймэл оюун ухааны тусламжгүйгээр энэ эмзэг байдлын гинжин хэлхээг 10 цагийн дотор бүрэн илрүүлж, боловсруулж чадахгүй байсан гэдгийг итгэлтэй хэлж чадна”
гэжээ.